下半年一開波就跌過九百點，開局認麻麻，人仔離岸價(CNH)一度高見6.73，日日跌真係心都慌，去年有一個說法係人仔升值就買H股，內銀資產升值嘛，再揀啲重外債的股，都係受惠升值呀，所以去年北水源源湧入，無論呢個說法對不對，依家就係倒轉黎玩，人仔貶，H股跌，北水又唔來，慘啊。
不過上證在中午前已經逐步收復失地，疑似國家隊進場推番啲內銀上去，到兩點鐘左右人行行長易綱話要維持匯率穩定，CNH即刻有反應，但港股都係慢慢爬番上黎，去到歐洲時間，CNH都見6.64了，你話個匯市都可以咁chok，青冰兩點看到彭博引述行長講野，匯市股市已經郁緊，如果你跟車太貼，又只係睇港媒報導，真係挾死都唔知咩事。
咁係唔係下半年唔使玩呢? 又不一定，一月頭同你講個市就爆喇，快啲走貨啦，肯定冇人會信，所以我們現在又憑咩講個市死梗呢。不過市況差都不是一朝一夕可以復原，但正如昨天所講，集中玩自己的核心股，暫時唔好理大股住，第一波的走資沽售過後，資金仍然都係要搵野買，最後仍然會有強股誕生，如果你的心水股呢期跌得少，成日都唔到自己的目標價，恭喜你了，呢隻下一浪可能再創新高，要密切注視呀。
Search